رجال تحت سن البراءة .. طبيبى الخاص تسلط الضوء على الجانب الآخر من حياة \” بلية \” .. نموذج الطفل المصرى المكافح

أحدهم يحلم أن يكون طبيبا .. و آخر لا يريد غير الستر و \” هدمة جديدة \”

و ثالث لا هم له غير راحة والده الذى أقعده هم الفقر

كشفت الستار عن حياتاهم ـ صفاء بدر ـ

رغم صغر سنهم إلا أنهم يمثلون ظاهرة مرضية فى مجتمع تمتهن فيه البرائة فى صورة مرضية اجتماعية تنذر بخطر داهم على براءة أطفال أحاط بهم الفقر و المرض و انحسرت أحلامهم فى رحلة بحث يومية يلهثون فيها وراء لقمة العيش .

\” بليه \” طفل لا يتجاوز الإثنى عشرة عاما موجود لدى الميكانيكى والنجار والسباك  منهم من يكمل تعليمة ومنهم من ترك التعليم لانشغاله بالعمل .. موجود فى امكان كثيرة يبدا يومه من الثامنة صباحا وينتهى فى العاشرة مساء .. يخرج من بيته ليسعى على رزقه وخصوصا اثناء الصيف لا ينتظر والدا يذهب به إلى النادى أو إلى المصيف فهو كل همه أن ياتى آخر اليوم و معه مبلغ من المال يساعد به أسرته , والرجولة عند \” بلية \” تعنى النزول لسوق العمل مشاركا الكبار فى معترك البحث عن لقمة العيش فهو رجل منذ نعومة اظافره .

\” طبيبى الخاص \” تفتح ملف خاص جدا حول رجال تحت سن البراءة .. ذهبنا اليهم فى أماكن تواجدهم فى السبتيه,القلعة,بولاق ابوالعلا وغيرها من مناطق تجمع ورش الحدادة والنجارة وغيرها من الورش وتحدثنا معهم وسالناهم عن ماذا يريدون و ما هى أحلامهم.

منهم من توجه بالحديث ومنهم من تجاهلنا ومنهم من خاف وتركنا واختلفوا فى ردوا افعالهم ولكن اتفقوا على البحث عن الرزق ومبدا الكسب الحلال رفاعين لافتة  تقول\” انا مش طفل شارع انا لى اهل ورجل وحعرف اشيل المسئوليه والشغل مش عيب مدام حلال\”

نفسى ابقى موظف

\” نفسى ابقى موظف \” هكذا رد علينا احمد حسن 8 سنوات عندما سالناه ماذا تتمنى؟

يعمل مع والده على \” نصبه شاى \” فى  حى السبتية بالقاهرة

أحمد لديه وجه برئ بالرغم من ظهور علامات الاجهاد عليه نتيجه العمل الشاق والمتواصل فهو طفل يعمل اكثر من ثمان ساعات يوميا,وعندما سالناه ماذا يفعل فى اجازته الاسبوعية رد بكل عفويه قائلا \” اصلا مش باخد اجازة انا شغال على طول مع ابويا مش بسيبه ايدى بايدوا\” واستكمل محمد قائلا انا ليا اخت بتجهز وانا اللى حجهزها ولما تتجوز وتروح بيت جوزها ابقى انشاء الله اخد اجازة \”.

فبادرت بسؤاله نفسك فى ايه يا احمد فرد قائلا \” مش فاهم يعنى ايه نفسى فى ايه فكررت السؤال فنظر لى اه تقصدى لما اكبر نفسى ابقى موظف ونفسى ابويا يريح كدا كام يوم ميفكرش فى حاجه وانا اللى اصرف على البيت \”

نفسى البس حاجه جديدة

وفى ورشه خراطه بنفس الحى قابلناه يذهب ليشترى طعام لصاحب الورشه الذى يعمل بها وقبل ان نستوقفه ونساله استوقفنا هو سالنى انتى مين وعاوزة ايه فرددت عليه و قولتلو عاوزة حضرتك ممكن نتكلم مع بعض شويه فرد  \” اه ومالوا \” واصر على ان يفهم كل كبيرة وصغيرة عنى قبل ان يعطينى اى معلومة ثم اطمئن قليلا وبدا كلامه \” بصى يا ابله\” انا بشتغل فى ورشه جزم واسمى \”سعيد بيومى\” وعندى 12 سنه وبشتغل من وانا عندى 7 سنين وانا عارف انك حتقولى عليا اطفال شوارع \” فاستقوفته واعترضت واكدت انى اعلم انه ليس من اطفال الشوارع فاستكمل قائلا \”بصى احنا بنشتغل علشان عارفين قيمة القرش ومش عاوزين نمد ايدينا لحد ولعلمك انا بدرس وشاطر فى المدرسة وحكمل و سالته نفسك فى ايه فرد بسرعه \”عاوز حته جديدة \” فاستفسرت منه يعنى ايه \” حته جديدة \” قالى \” يعنى حته زفرة \” فاستغربت جدا فنظر لى بزهق وضيق \”يعنى لبس جديد يا ابله \”

يستر علينا ربنا

قابلنا  \” عبد الرحمن \”بفرن العيش فى حى المحمرة \”ببولاق ابو العلا\” تبدو عليه الشقاوة عنده 11 سنه ولكنه يبدو اصغر فى شكله وجسمه النحيل جدا فعندما رانى ادخل للفرن استوقفنى قائلا\” ابله العيش من الكشك \” فرددت عليه انا مش جايه اخد عيش فرد \” يبقى تامنيات شكلك كدا تامنيات او ضرائب\” فرددت لا بردوا قالى \” طيب ايه \” قلتلوا صحفيه\” فرد بسخريه \” يعنى الكاميرا الخفيه\” قلتلوا متشكرة فاتى لى وقال \”متزعليش منى يا ابلة خير\” بقا لخصى \”عاوزة ايه \” فقلت له نفسك فى ايه؟ ضحك ضحكة عاليه جدا ورد قائلا \”جايه المشوار دا كلوا تقولى \”نفسك فى ايه\” فاكدت على السؤال فرد والله نفسى ربنا يستر علينا\” .

نفسى يبطلوا ضرب فينا

محمد عادل\”طفل يبدو عليه الالتزام والعقل\” ولديه نبرة صوت حزينه الى حد ما عندما سالته عن ماذا يريد ويتمنى رد بعد فترة قائلا\” بصى يا ابله انا بشتغل علشان اسعد نفسى اهلى مش بياخدو منى اى حاجه انا بحوش طول الصيف علشان اشترى حاجات المدرسة وادفع مصاريف دراستى \” وبوجه ونبرة غاضبة استطرد قائلا\” وياريت تبطلوا تقولوا علينا اننا شحاتين وعيال ملاناش اهل\” لا لينا والله اهل واخوات واب وام واحسن من اى حد اقعد فى البيت ولا واقف على ناصيه وبيعمل مشاكل زى البلطجية \” فاكدت عليه انو مش حيحصل اننا نقول كدا عليه وسالته نفسك فى ايه فرد \” والله نفسى يبطلوا ضرب فينا\” رددت \” مين دول فرد\” المدرسين يا ابله فى المدرسة \” التعليم وحش جدا والمعامله واقاعدين  يجى 60 طالب فى الفصل والنبى دا ينفع \”

الاسعار نار لية

حسين أحمد \” يعمل فى محل عصير بوسط القاهرة عنده 9 سنوات يبدو كانه اكبر من سنه فى اسلوب حديثه وبدا كلامه معى بمنتهى الود كانه يعرفنى من سنين فقال لى \” انا اصلا من الصعيد وبجى فى الصيف اشتغل علشان اجمع فلوس الدراسة \” وسالته لية بتشتغل فى القاهرة ومش فى بلدك \” فنظر لى وقالى \” يا ابله لو اشتغلت فى بلدى حشتغل ببلاش محدش حيدينى حاجه علشان احنا كلنا اقرايب فى بعض اما هنا محدش بيعرف حد\” بس والله الصعيد احسن على الاقل مفيش الدوشه دى والزحمة \” انتوا عايشين ازاى\” فتهربت من السؤال بسؤاله \”نفسك فى ايه يا سحس فرد \” نفسى الاسعار تنزل شويه الاسعار ليه كدا نار فى الطالع علطول كانى مفيش حد يشتغل ولا بينتج .

تهربت من السؤال للمرة التانية واستاذنت بالذهاب.

نفسى اتعلم بجد واتعالج لو عييت

\”احمد مختار\” عنده 10 سنوات يعمل فى محل اطارات سيارات بقالوا خمس سنوات نزل سوق العمل من سن خمس سنوات رايته فى احدى شوارع حى القلعة وكان يعمل بكل اجتهاد ونشاط فقدمت له نفسى فرد \” يامرحبا يا مرحبا بالصحافة كلها\” فاستطرد  قائلا اقبل اى حاجه واى كلام لازم اعمل معاكى الواجب

تشربى ايه يا ابلة فرددت\”متشكرة\” فنظر لى وقال\” كدا مينفعش انتى بخيلة ولا ايه\” قلتله بعدين فرد \”ماشى تقع المرة دى\” فضحكت جدا \” وسالته عن ظروف شغله فقال \”حقولك انا الاول كنت بنزل غصب وبالضرب كنت بحب العب فى الشارع اوى وكنت بعمل مشاكل كتير فى الحارة الشغل دا كان بالنسبالى حاجه وحشة ورخمة اوى بس لما كبرت خالص فهمت ومن بعد ما ابويا اتوفى بقيت راجل البيت ولازم مخليهمش عاوزين حاجه وانشاء الله بردوا حكمل تعليمى رغم انه مبقاش فى تعليم انا فصلى فى اكتر من 50 واحد, والمدرس مش بيشرح كلوا ضرب ودروس خصوصية, ولو عييت معنديش وممعاييش للدكتور و المستشفى اللى جانبى مفيهاش غير فئران ورحت مرة الدكتور زعقلى وقالى قوم انتا مفكش حاجه وكانت رجلى مكسورة فنفسى اتعلم صح واتعالج كمان.

نفسى امى تحج

كريم طفل جميل \”8سنوات\” لا يبدوا عليه التعب او الاجهاد بل بالعكس اعتقدت انه صاحب محل اكسسوار سيارات من شكله المهندم واسلوبه الهادئ, ولكن مع الحديث معه اتضح لى انه يعمل نص يوم يعمل فى هذا المحل من سنتين واستكمل قائلا\” صاحب المحل بيعاملنى كانه ابنه هو ساعات بيزعق لى بس علشان مصلحتى وانا بصراحه مبسوط انى بشتغل بساعد البيت وكدا يعنى

وعندما سالته \”بماذا يحلم او يريد\” فاجاب \”نفسى امى تحج \”

حبقى دكتور ان شاء الله

عمرو طفل يعمل لدى احد السباكين فى حى شبرا عنده 9 سنوات مجتهد جدا فى دراسته كما علمت من امه وخاله ويحب شغله وعند مقابلتى به كان فى المحل فى الصباح الباكر يقف امام المحل يرش المياه بعد كنسه فصبحت عليه فرد متوجسا الصباح و عندما ظهرت والدته اطمئن ورد \”خير يا اما فقال لى ايه الحكايه وافهمته ماذا اريد فرد\” قائلا بصى يا ابله احنا الحمد لله مستورين ولا شحاتين ولا بنمد ايدينا احنا كلنا فى التعليم انا واخواتى الخمسة والست اللى ادامك دى هى اللى ربتنا بعد ما ابونا رمانا حته لحمه حمرا  وانا انشاء الله حكمل معاها المشوار بس مش موضوعنا \” فنظرت له وسالته طيب انتا نفسك فى ايه \”فرد انا مش نفسى فى حاجه مش عاوز حاجه من حد انا اشاء الله حبقى دكتور ودكتور كبير كمان .

ختمت جولتى مع اطفال رجال بمعنى الكلمه ليس لرجولتهم حدود كما يكون مع البعض من اشباه الرجال التى رجولتهم لاتتعدى خارج خانه ذكر ببطاقتهم الشخصية,اطفال نزلوا لسوق العمل مبكرا ليبحثوا عن العيش الحلال لا ينتظرون اب او ام واخ كبير يتكفل بهم فهم فى غنى عن اى امر يتنازلوا عن اى حقوق الا حق العمل والعيش والكسب الحلال لا يسترضون احدا ولا يتسلقون لاخذ منصب او مركز او يذهبوا للابواب الخلفية من حياتنا لحصول على ما ليس من حقهم,لم يتذمروا او يغضبوا لعدم وجود المال بل سعوا واجتهدوا وتركوا حقهم فى الترفيه والاستماع بالحياة , فهم رجال فى دنيا الحاجه وضيق ذات اليد.