الحلقة الثالثة من البرنامج الأدبى
(فتافيت السكر )
قصيدة (الغربة ) من ديوان (اوليات العشق) اصدار عام 2000
لشاعر الوطن /على رضوان
فتحت باب المندرة
فى عز الضهر
الجو خالى
قلت أنام شوية تحت أوراق الشجر العالى
هبت نسمة جميلة بلون الطهر
قالت ..مين جابك تحت اللبلابة
جى تشكى همومك ليا
ولا تعيد الماضى مع البنت ام عيون كدابة
ضحكت من قلبى
ورجعت للماضى
عشت الوقت اللى مهوش وقتى
وأفتكرت
أيام شبابى
والقعدة الحلوة مع صحابى زمان
وقت الوقت ماكان أمان
فقت من حلمى السارى
ضاعت الصحبة
والشمس ف غربة
ولاقيت روحى كدا محتاس
قلت ياناس
مالقيتش الناس
غابت الشمس وضاع الماس
وضاع الحب الطاهر من قلب الناس
ولقيت الغربة فى قلب الناس
حسيت بالغربة
وسكوت العضم جوه التربة
شق فجر اليوم التانى
وبأن الصبح .. وطلعت شمس
فى عنيها الهمس …. بيتلون
ذى قلوب الناس
غريب ياللى ..ما عرفت تتلون
يأقلبى ياأبن ال……………………….
متلونتش ليه…………………………………………..
زى قلوب الناس !!!
