إنا لله وإنا إليه راجعون النهاردة ذكرى الوفاة يامحسنين والزيارة بعد الضهر فى مقابر البساتين والعزاء قاصر ع الفقراء والمساكين أصل المرحومة عندها شوية ملاحظات على أصحاب الملاكى والتكسيات من يوم ما ماتت العام اللى فات ورمت نفسها وانتحرت تحت العجلات قدام المارة والملاكى والباصات ياما اشتكت وكانت شكوتها آهات بتأن وتتوجع وتلف فى جميع الجهات من غير حيا ولا خشا من العربيات ويا سلام لو فيه زحمة اتوبيسات تبقى بدل الشكوى نواح وصراخ عندكم بدل اللمبة ثلاث لمبات واضحة وضوح الشمس في السموات أحمر وأخضر والأصفر للاستعدادات وخطوط فى الأرض متلونة بكل الألونات ومفيش فايدة هرج ومرج ودوشة كلاكسات ولما غلبنا فيكم حطينا الكاميرات واللى فيكم .. فيكم اااايه بتلعبو المساكات وتجروا ورا بعضكم وتكسروا الإشارات هى دى لعبة التعلب فات فات ده غير الحوادث فى الشوارع والطرقات قلبى اتوجع وحسى اتنبح من الآهاااات وساعتها قلت مفيش فايدة بقى يا حضرات والموت علينا حق وقررت انتحر تحت العجلات واعمل ذكرى سنوية تفتكروا بيها جميع الإشارات
